مش ممكن

كما قال واحد  معرفهوش :

وما نيل المطالب بالتمنى _-_ ولكن تؤخذ الدنيا غلابا

مش هكتب ليست بالامنيات عشان اشطب عليها لما احققها ولا عشان لما احققها احس انها حاجة تعبت فيها وعملتها
لكن لمجرد انى اعيش الحلم نفسه مؤقتا يعنى "بشتغل نفسى بمعنى اصح :) "

خاصة ان عيد ميلادى قرب وانا بحب اجدد يعنى :)

ممكن اذكرهم  كالتاتى :- 

 الاولى :

اول القصيدة كفر :)

عايزة كاميرا ديجيتال زى دى

  لو حد هيتبرع ويجيبهالى وفى نوع احسن مش همانع على فكرة :)

لكن انا لو معايا فلوس هفكر قبل ما اشتريها بصراحة :)  الا لو ربنا فاتحها عليا ومعايا فلوس كتير اوى يعنى  :)
وطبعا لانها الرغبة الاولى والاهم بالنسبالى زى ما انتو شايفين فانا ممكن اطلب انها تبقى شبكتى (لما يبقى يحصل يعنى :D)
الحقيقة نفسى فى الكاميرا دى اوى ..عارفة انها امنية تافهة بالنسبة لناس كتير بس هموت واجيبها :(


__________________________________________________________________________

 التانية :-
اكيد يعنى هتبقى لاب توب

يكون شخصى وخاص  بكل المقايس بمعنى انه يبقى تمنة كامل اكون انا اللى تعبت فيه بشرط يكون لاب محترم ويستحمل اللى هعمله فيه مع انى ببقى طيبة (احيانا) لما يكون الجهاز ظريف
المهم لو برده حد عايز يتبرع ويجيبلى واحد معنديش مانع بس برده هفضل احلم انى انا هشترى واحد على حسابى ف يوم من الايام :D
  وكنوع من الرخامة على نفسى لازم يبقى شكله ظريف ولونة كمان يبقى بينك او اصفر!!
يااااااااه مش متخيلة لاب لونة اصفر
اكيد هيبقى تحفة : D
 

___________________________________________________________________________

 التالتة :-

عربية

لالالالا متخوفوش محدش يفهم غلط :))
اى نوع بس يكون شكلها ظريف
مش شرط تبقى نفس بتاعة بيل جيتس يعنى عشان ميقولش انى بقلده بس :)
وكمان انا بحب العربيات الصغيرة اصلا
بس ملحوظة
اينعم انا بحب العربيات القليلة اللى بتبقى ملمومة دى (دا عشان الحسد مش عيب لا سمح الله يعنى )
بس اكيد مش صغيرة لدرجة انها والتوكتوك يبقو  فى لفل واحد
عربيه محترمة وكفى
ويبقى لونها اصفر برده ياريت يعنى :D

______________________________________________________________

الرابعة :-
مكتب فى مكان كويس ف المنصورة

معرفش لسه هو هيبقى عشان ايه بالضبط بس المهم انى ساعتها هحس انى مهمة وكدا

اللى اهم من المكتب فى حد ذاتة انى  مش متخيلة نفسى قاعدة ع كرسى  ورا مكتب عريض زى اللى  بشوفه فى المسلسلات
ورافعة سماعة التليفون وبكلم السكرتيرة (بكل تناكة)  واقولها لو سمحتى جهزى البروجرام بتاع اليوم ويبقى ع مكتبى خلال 7 دقايق  (ومعرفش ليه  7 بالتحديد يعنى :D)
انا مش متخيلة نفسى وانا مهمة الصراحة  او انى هبطل ابقى تافهة وكدا
نفسى احس احساس الناس المهمة 
سيبونا ناخد فرصتنا بقى
:))


_____________________________________________________________________

الخامسة:-
دى بقى قولتلكم عليها قبل كدا
رحلة طويلة
طويللللللللللللللللله اوى
لــ تركيا طبعا كــ بدايه

 
بعدها  ماليزيا ,
 انتو مش متخيلين ماليزيا شكلها ايه على فكرة
خرافة ..............

و اليونان ( قبل ما تفلس)

 

كفاية الصورة اللى جاية دى 

بحس انها بوابة لجنة فى الارض

 

, الصين
وما ادراك ما الصين احنا بنتكلم عن تالت اهم وجهة سياحية فى العالم

اللى يشوف شوارع بكين واستضافة الدورة الاولمبية
هيتاكد ان مصر كانت لازم تاخد 95 مليون صفر فى المونديال
:(
الله يكسفهم


وجنوب افريقيا
ولا ايران
وممكن تونس عشان اشوف (ام يس) صديقتى التونسية
 واخيرا السعودية عشان احج

بعدها ارجع لام الدنيا شاوة بلدى اموت فيها بقى :)

وبعد ما اموت
:))
:
  اصحى
اقول خير يارب اللهم اجعله خير  :D:D
________________________________________________________________________________

كفاية كدا

  عشان محدش يقول انى هبلة
اطمنو انا لسه بعقلى انا بس سرحت شوية

 

لا الكلمات تتمايل ولا الحروف تتهاوى حينما اتحدث عنك
لا اتسمر فى مكانى ولا اختلق الحديث حينما تكون جانبى
لا اسرح فى خيالات ولا تستحي عيونى ولا تحمر وجنتى حينما اراك
بل انظر بثبات فلست تاء تأنيث كما تظننى وكما يظن الاخرون ..
انا اقوى من نظرات متهافته او دموع مستعطفة تظنها انها فقط خيالاتك التى لاابالى بها
انا لست المسكينة التى تظنها بل ولست العاشقة المتيمة التى سترضى غرورك يوما
فقط انتظر تواجدك حولى او ان ياتى اسمك فى وسط حديث احدهم كى اثبت لنفسى دائما اننى كنت ومازلت الاقوى
اتقبل غرورى منى ولن اتقبل غرور غيرى يوما

وهم كبير اسمه مبدأ

بكتب البوست دى وانا هموت من الغيظ بجد

الحكايه انى كل ما جى اتعامل مع حاجات كتيرة بمبدا معين انا مقتنعة بيه اكتشف ان المبادىء دى لاتصلح على الارض اللى انا عايشة عليها ولا مع اى حد انا بتعامل معاه فى حياتى

+++++++ فى البيت لازم تتعامل كانك طفل مهما كبرت فى كل حاجة
لوعايز نجم من السما كل اللى محتاج تعمله انك تزعل شويه او تدمع ولو مش زعلان هتعمل فيها زعلان ,,ولو نجوم السماء بعيدة بتدبد شويه فى الارض وتعمل فيها مسكين ومظلوم وفجاة نجوم السما كلها تبقى قريبة ,, ماهو طبيعى انى مش هكبر ,,الصراحة مش عارفة اكبر او يمكن مش عايزة !
والله حاولت اكبر و مستعملش الوسائل بتاعة الاطفال دى بس مفيش اى استجابة حواليا والكل عاوزنى طفله وكأن وانا كبيرة مشاكلى هتبقى كبيرة اما لو فضلت صغيرة هتفضل مشاكلى صغيرة مهما كبرت

++++++ كل ما احاول اشتغل واتعب شويه فى اى حاجة فجاة بلاقى بعضهم بكلمات - بقصد او من غير قصد - بيحبطنى ويحسسنى قد ايه انا تافهة ,فجاءة الاقينى اتقلبت 180 درجة , وكأن فى سر .. ليه الوقت دا بالذات وليه العناد دا.. بجد بدات ازهق من اى حاجة ان مكنش من كل حاجة

+++++++++ مبحبش اكدب -واعتقد ان محدش بيحب يكدب - لاكن فجاة تلاقى كل اللى حواليك عايزينك تكدب والاكتر من كدا انهم بيجبروك كمان ع الكدب
الموضوع دا عامل زى اللى بيخير واحد بين انه يموت محروق او غريق ,, بدات اكره التناقض اللى انا عايشة فيه
*ويقولك الدبولماسية فى الرد : "" الواحد ممكن ميبقاش صريح اوى احسن ما يكون كداب!!!!! ""حتى دا كمان حاسة انه بيبقى كدب بس باحتراف 00 لانى بخفى الحقيقة بس با تقان..//شعور سخيف اوى..
كون انى معرفش اواجه اللى ادامى فدا منتهى الضعف اللى فى الدنيا من وجهة نظرى
بيقابله احساس بقوة غريبة لما تواجه الشخص اللى- المفروض - تكدب عليه ,,,وكلمة المفروض كنت عايزة احط تحتها 100خط لان الناس اللى بتخترع الكلمة دى عشان تبرر حاجات كتير
*افتكر وانا فى تانية ثانوى لما الواحد حس انه كبر شويه وممكن يبقى ليه قررات ,,,,\/,,,قررت من ضمن مجموعة قرارات كدة :: انى مكدبش ولا اجامل اى حد, وفعلا عملت كدا ,سبحان الله اكتر وقت الناس كلها اتهمتنى فيه بالكدب وقله الذوق وانى مش بحترم حد ..انا شايفة ان احترامى لاى حد يقاس بمدى صدقى معاه مش بمدى مجاملتى ليه ..اه الذوق مهم بس مهما كان كلامى فيه زوق فالكذب والمجاملات لهم ايقاع اعذب على اذان الناس ودا اللى اكتشفته مؤخرا للاسف

**دا بالنسبة من اللى بيضايقنى فى الناس لكن بصراحة فى حاجات اكتر بتضايقنى فى نفسى ,ومش عارفة اغيرها
بحس كتير انى قليلة الزوق وسلبيه واحيانا غبيه
يمكن انا كدا وهفضل طول عمرى كدا بس المشكله ان عندى عقدة نقص - اه هو كدا -