شخابيط

اكتوبر 2016

1 اكتوبر

النهاردة يوم مميز وحلو 

---------------------------------------

يناير 2016

8يناير

عيد ميلاد عبدالله 

9يناير

محدش بيتمنالك الخير اللى يناسبك ! 

هما بيتمنولك الخير اللى هما شايفنه مناسب  -ليهم- واريح بالنسبالهم 

(يعنى بينصحوك بالخيارات  الاقل ضرر عليهم ) مش الاحسن ليك من وجهة نظرهم  زى ما انت متخيل !

تخيل ان حد  ااول مرة تقابله او اخر مرة هتشوفه  ..يعنى مفيش تحامل مفيش مجاملات مفيش مصلحة ومفيش حسابات  مفيش   ! 

الموضوع كله بيعتمد على درجة القرب او درجة تاثير الصلة اللى بتربطكم على الاخر 

باختصار ...

 الخيارات المناسبة مش  شرط تكون  الافضل ليك ... 

ديسمبر 2015

 12 -12

- حاسه احباط يكفى دنينى  ... وكآبة ممكن تنهينى !

- ليه الناس مبتقولش على طول ليه لازم نستنى  !.. وليه مبنبقاش على الناس اللى بنرتاح معاهم وبنخاف منهم ونبعد 

- ليه فى ناس كتير محبطة ..!

- 

- مش دايما الاهل بيتمنو احسن حاجة ليك ... بس كتير بيتمنولك الحاجات اللى بتريحهم هما اللى مش شرط تكون بتسعدك 

- السنة اللى فاتت اكتشفت فجاءة انى عمرى ما سافرت اى مكان  والموضوع دا سبب لى اكتئاب شديد ,

    السنة دى لقيت حاجات  كتير كان نفسى اعملها , وكلام كتير كان نفسى اقوله , ومشاعر اكتر منعت نفسى عنها 

     اكتشفت انى مش عارفة اعمل اى حاجة فى حياتى اللى عمرى ما حسيت انها ملكى  ولا تخصنى !

- انا محبطة جدا !!

- انا  لسه تايهه !

يوليو 2015

 23-7

انك متسامحش حد ويفضل بينكم لوم 

افضل من انك تسامحه دلوقت وتكرهه بعدها 

#حقيقة 

فبراير 2015

3-2 

- مبقتش عارفة اصدق حد ولا  اتعامل مع اى حد ... 

انا مش عايزة اعرف اى حاجة عن اى حاجة ولا اى حد .... 

مبقتش اشوف حاجة اصلا  ..... 

يناير 2015

29-1

-- ابواب الجنة لامساها بـ إيد

 والايد التانية مشبوكة فى ايديكى

 بس حواليكى الابواب متجنزرة

انا هنا مش لاقياكى ولا عارفة اسيبك 

مش عارفة مستنياكى ولا مستنية تسبينى وتبطلى شعبطة !

-- مش عارفة هوصل لفين ....... يارب !

--------------------------------------------------------------------------------------------------------------------------


نوفمبر 2014

30-11

احياانا ببقى مش مستحملة ان امثل انى معنديش دم !بس البعد عن الوجع راحة !
حاسة ان الناس  عايشة عشان  خايفة من الموت
انا عايزة اسيب الناس فى حالها !

28-11

كلمة زيك .. كلمة زيك , واللى زيك فين .... دا انت زيك متخلقش اتنين 

يخربيت كدا :D 

https://soundcloud.com/bahaazaid/gj51cddjw1op 

27 -11

- موقف سخيف فكرنى بكل سخافاتى , بس انا كدا انيل ايه فى نفسى يعنى ,

 والله بحاول ابقى لطيفة , بس برجع اقول لنفسى وابقى لطيفة ليه طالما الناس لسه بنفس الرزالة !! 

26-11 

نوفمبر قرب يخلص الحمد لله , خد زينب  زى ما اخد حاجات حلوة معاها  

اتمنيت راحة زى راحتك بس اهو لسه عايشة ,وبسمع حسن الاسمر :)

,وبقيت بنسى كتيرعشان اعرف ابقى مبسوطة , 

بس لسه مبصليش ومش عايزة اشوف حد  , 

اطمنك فى ناس كتير بتدعيلك بالرحمة  وبقو يتكلمو عنك كويس وبيقولو مسكينة 

 زعلو شوية وكدا وعملولك هاشتاج بـ اسمك والميديا اتكلمت عنك وشيرو صورتك 

تحسى اننا زعلنا زى ما مختار زعل على روكة كدا فى فيلم العار بس متجننش غير لما البضاعة

 راحت فى الملاحات  !!

 المخدرات لسه بخيريا زينب  واحنا كمان ........ بس :)

5-11
- حاسة بوحدة مضايقانى يمكن مش احساس جديد بس مبقاش فى حاجة استناها , كل حاجة بقت شبه بعضها ...
-- حاسة انى ضايعة  ...... ايه الدراما دى ! !

3-11

 - يارب الايام دى تخلص بقى ... نفسى اغمض عينى وافتحها الاقينى فى سنة جديدة فى عمر تانى ... انا تعبت ! 

-  مكتئبة لدرجة ان دماغى مليانة افكار وحشة .. يارب عدى الايام تقيلة اووى مبتخلصش :(

اكتوبر 2014

31/10

انا عمرى ما سافرت .... افتكرت دا النهاردة بس  وانا سنى بقى 23 سنة  :(

- مع ولاد اخواتى عبدالله عبدالرحمن ومحمد ... ما تبقى لى من الـ 23 سنة اللى عدوا :)  !

سبتمبر  2014

3-9 

اغسطس 2014

25-8

الخير ما اعطى والخير ما منع  الحمد لله 

مايو 2014

1-5

----- حيث لا طرقات !

11-5
شمس العصارى غابت ياللى بلادك بعيد ... ياللى بلادك بعيد .
الكلام كتير ومشاعر اغرب مبقتش عارفة انا عايزة ايه......  انا فى مشكلة !

15-5
مفيش حد  وحش فى المطلق هو بس مفيش حد حلو على طول ...
-- الانتظار وحش اووى
   -- بدءت احس الانتظار اللى انا فيه  دا حاجة مرضية ..... انا عيانة ولا ايه ! :(

16-5
-- مش كل الدموع حزن  :)
  .... معظم الوقت بتبقى اشتياق وكتير سعادة او انتظار وكتير قهر !


18-5
"إن كان لا بد من حُلم، فليكن مثلنا... وبسيطًا"

                                          --------------------------------------------------------------

يناير 2014

31-1

-- جبانة ومش بنكر ... بخاف ... مش بخاف .. انا بترعب كل ما افكر بس  فى الارتباط !

اكيد اتمنيت وحلمت 

.......... كان نفسى بس افرح  !

يااارب 

-----------------------------------------------------------------------------
-يونيو 2013

11-6

( الحب ) احيانا بيبقى انك تلاقى حد مناسب لفكرة انت بانيها عن الشريك من خلال تربيتك وثقافتك واحيانا تجاربك

 وساعات بيبقى مادى لدرجة انك بتتمنى ملامح معينة .. طول معين ... لون عيون ...مقاس وسط :D ... وبتوصل لمقاس الجزمة :)

 .....سمعت مرة الشيخ العريفى بيتكلم عن لقاء التعارف اللى قبل الخِطبة وبيقول ان الشاب او البنت بيبقى عندهم تصورات معينة  فلما بيلاقوه  قريب من التصورات دى بيقى دا اسمه القبول اللى بيسبب الحب  بعدها ...زى انها تبقى فيها شبه من والدته مثلا ... او هو يبقى شبه ممثل او شيخ بتابعه ومالوف بالنسبالها .

.... وقليل اوى التصور بتاع المراهقة انه عواطف وقدر بيجمعهم والجو بتاع هانى شاكر دا  ... ما هو لو كان كدا كان هيبقى على راى اسماء سديكتى  الناس اللى من النوعيه دى بتحب على روحها اى حد فى اى مكان فى اى معاد  وبتبقى زى البحر يحب الزيادة معندوش مشكله بيس ع الاخر .

-------------------------------------------------------------------------------------------------------

مايو 2013 

-12-

غادِر بيتك كل صباح ، وكأنك على موعد مع الحب . تهيأ له بما أُوتيت من أناقة . يحلو للحبّ أن يُباغتك في اللحظة التي تتوقّعها الأقل..... احلام مستغمانى 

---- مع سطحية كتابات الست دى بس عندها بعض الحق مجرد ابتسامة فى حياتنا عبارة عن حب صامت .

ابتسم والحب اللى هيدور عليك مش هتحتاج تفكر فى الحب وانت عايشة كل لحظة مع كل اللى بتقابله

من اول ما تصح من النوم  .. محتاج تحاول تضحك وان مقدرتش ابتسم و السعادة هتدور عليك :)

________

17-5

بحبك وانطلق عصفور وأسبح في الهوا والنور وأملا الكون بأغانيا ولو كان الجناح مكسور أحبك تستكين الريح في قلبي والأماني تصيح بحبي وأعشق التصريح ودربي في الضباب مغمور أحبك تبتدي البدايات تاخدني ضحكتك بالذات تعيدني روح وقلب وذات تزيدني كشف للمستور أحبك ضي روحي يبان وأعبر ضلمة الحرمان وأهجر غابة الأحزان وأحقق حلمنا المسحور

---------
25-5
عن شعور بتحسه لما بتشوف  حد ...و مجرد صدفة تجمعكم بتحس انك مبسوط مش عارف ايه السبب بالضبط
من غير كلام ... من غير تفاصيل ... مجرد صدفة من وقت للتانى
الغريب ان  انت مش عايز منه حاجة وعارف ان انت مش  بتمثله حاجة ... بس هى بتقلب باابتسامة طول اليوم مصدرها (انشكاح ) داخلى غير معلوم المدخلات ...... اه والله :D :D

-----
30-5
مش عايزة حاجة من حد..... سيبونى فى حالى ! 

__________________________________________________________

مارس 2013

1-3

 -- الناس الفاظها اتغيرت اووى ... مستوى كلامنا بقى (نهضة) خالص :D

 -- كلنا متضايقيين من حاجة ...... بس عمرنا ما هنقولها لحد :)

 .....................................

---------------------------------------------------------

فبراير 2013

-------------------------------
 1002
لو مشكلتك انك شايف اللى حواليك وحشين .... دى مش مشكلة اطلاقا  !!
عشان المشكلة اللى بجد لما تحس نفسك اوحش حد عرفته فى كل اللى حواليك . :( .....
-------------------------------------------------
1102
مشكلة الرسايل السلبية  وايحاءات  الفشل ... ماثرة عليا بشكل كبير
------------------------------------------
1802
 الحزن احيانا بيكون رفاهية ومتقدرش تعيشه ....
...............................................................
2302
ازبل ناس ممكن تقابلها فى حياتك هى  الناس اللى شايفة نفسها مميزة عن الباقى ومستكترين النصيحة على الناس
عالم زبالة صحيح
............................................................
2402
-- 3 مواد راسب نظرى وقشطة يعنى شيلت السنة خلاص .... مش عارفة هبلغ الناس ف البيت ازاى لسه  !!!

--  قابلت دعاء يعنى   4  سنين ويوم ما اشوفها تبقى فى الظروف دى  :)  كنت فكرانى اتنسيت لكن طلعت فكرانى  ,,, برغم الضيق ربنا كريم وبعتهالى من السما هونت عليا صدمة النتيجة و طول الطريق الله يكرمها ......يا كريم يا رب

---لعله خير ... راضية يارب , احمدك على الرضا ..

.....................................................................
2402
ظمأن والكاس فى يديه !!
...............................................................