"الوقت "
اقوى كلمة ممكن اسمعها ,, لها سحرها , كلمة لازم اعطيها قدسية وانا بتكلم عنها ..
"الوقت" اللى مش بتحس بيه مهما كانت الاجواء سواء حزينة او سعيدة او ممله او مليانة دوشة
"الوقت " اللى بتحس فيه كل لحظة كأنها جبل , كل ثانية كانها سنين , بتتمنى كل حاجة تمر حتى لو هتنتهى بنهايتك المهم تمر !
"الوقت" اللى مبتحس انه عدى , عشان كل جزء من الثانية فيه محفور جواك
"الوقت " اللى عايز تنساه ,, مش عايز تحسبه , اللى نفسك تمحيه ,, او ترجعه تانى وانت مش فى نفس السذاجة ولا التلقائية او العدوانيةاللى كنت فيها ... اللى كنت هتسكت فيه مش هتنطق ,او هتقول كلام مقولتهوش , او تاخد موقف مأخدتهوش , وتحس حاجات كان لازم تحسها , او متحسش خالص ! , اللى كان المفروض تفكر او تسأل او تاخد وقتك و متستعجلش او تعجله او تأجله ....
"الوقت " اللى خلي كل حد و كل حاجة تتحكم فى قدرك واختيارتك وحياتك كلها الا انت .
"الوقت" اللى كنت ضعيف .. ضعيف لدرجة انك مش قادر تحسب كم الاهانات اللى اهانتها لنفسك بضعفك !
"الوقت" اللى كرهت فيه نفسك وكرهت اللى حواليك , اللى الكره كان فيه اسهل شعور تحسه ادام كل كلمة تسمعها وكل ابتسامة مرسومة وكل ود ناحيتك .. حتى اليوم اللى اتولدت فيه ومش عارف انت ليه عايش لدلوقتى !
"الوقت" اللى كنت طاير ورجليك مش لامسه الارض من كتر الجنون ., بسبب كلمة دافية اتقالت لك مش متوقعها .. او صورة وانت مش واخد بالك .. او زكرى حلوة مرت بالبال .... او حلم اتحقق !
"الوقت" اللى ضيعته فى راحة ... او سكون .. وكان المفروض تتنطط فيه ومتقعدش
"الوقت " اللى عدى ومفيش حاجة جديدة .. اللى عدى وانت بتتحسر على اللى فاتك .. اللى اتقفلت فيه كل البيبان .. اللى حبست نفسك فيه .. اللى اتغيرت فيه ومبقتش زى زمان ...
"الوقت" اللى فيه قررت ,,وقررت ..وقررت ,,,ومعملتش حاجة ! ...
"الوقت" اللى كنت محرج ووشك فى الارض ,, عشان كنت ساذج وحد استغلك
"الوقت" اللى اتمنيت فيه الموت ومجاش !
"الوقت" اللى لسه بيعدى "الوقت" اللى لسه بيمر
"الوقت" اللى لسه بيقتل كل حاجة فى لحظة .. وبيسحرها فى عينك فى لحظة تانية
"الوقت" اللى مبيستناش حد ولا بيسيب حاجة على حالها !
