موسم حصاد المشمش !

التدوينة دى من اكتر من سنتين عشان كدا فى حاجات مكتوبة من سنتين او من سنة او من ايام
محبتش امسحها سيبتها زى ماهى وكملت عليها
---------------------------
فى نهاية كل سنة كنت بكتب تدوينة طويلة عن  السنة اللى عدت  واللى مر فيها او الذكريات المميزة

 كنت بعمل كدا كل سنة حتى لو منشرتش التدوينة وبعضها نشرته ومسحته 

والسبب ان دايما  مهما اتكلمت وكتبت كنت بخبى حاجة  او حاجات عمرى ما اتجرأت اكتبها او احكيها 

ويمكن غير الجرأة انى مش عايزة افتكر الحاجات دى او اسيب لها اثر فى نفسى والمدونة تبقى سبب فى دا

عشان كدا التدوينة دى قديمة وضيفت مشمش السنة دى على المشمش اللى قبله :) 

ما بعد الـ 26 

-- الحياة ما بعد الربع قرن مختلفة , مش حلوة ومش وحشة , هى مختلفة دا احسن وصف ليها !

-- مبقتش اهتم  بالتخطيط للى جاى ولا بالناس والاهم انى بدئت اتاكد ان التجارب هى اللى بتخلى اى حد اقوى 

مش الخيال والافكار والنصائح والتنمية البشرية

- اختياراتى اتغيرت كتير ، متغيرتش تماما ولا بشكل مٌرضى ليا،  لكن اتغيرت ودا اللى حصل ،
  ودى كانت خطوة خليتنى اجرب حاجات مختلفة واغير شوية فى تعاملاتى 

-- مفيش حاجة مبتتكررش ومفيش حاجة ماتتفوتش . الفرصة اللى بتروح بيجى بدالها عشرة 

والحب اللى بيختفى بيجى حب اجمل منه , والفلوس اللى بتضيع بيجى بدالها فلوس اكتر ,

كل اللى بيروح بيجى له بديل .. مفيش حاجة ملهاش بديل ومفيش شخص مبيتكررش !

-- الذكريات والناس الحلوة يستاهلو نفتكرهم , ويستاهلو نسال عنهم , , ويستاهلو نكتب عنهم ونكلم الناس عنهم

-- السنة اللى عدت كانت مليانة تشجيع وإطراءات على شغلى بالذات ان جازالتعبير الحمد لله على فضله
وكمان كانت مليانة بالناس والمواقف  اللطيفة اللى مش هنساها ، كانت ألطفهم على الاطلاق التويتة العظيمة دى  :)  

https://twitter.com/_Gabrail/status/914695821601492997

-------------------------------------------------------------------------------------------------

ايام ما قبل ال 28 

كنت نسيت  تدوينة المشمش دى ، بس لما لما فتحتها و قريت الكام سطر دول ، بدئت افهم انا بقيت كدا ليه دلوقتى بعد سنتين من كتابتها، مش فاكرة التجارب دى كلها ولا حتى المواقف بالضبط ، احسن حاجة عملتها لنفسى من فترة انى بدئت اعمل لذاكرتى حالة نسيان اجبارية ، حتى لو هفكر فى ولا حاجة ، حتى لو هبقى مع ولا حد ،

انا مش فاكرة كنت ايه  ولا كنت بفكر ازاى ، ومتاكدة ان أولوياتى دلوقتى كلها اختلفت عن وقتها ،
وافكارى بتختلف كل فترة  انا مش شبه نفسى من اسبوعين عدوا حتى !

انا مش مبسوطة بس  مرتاحة !
كفاية انى اقول انى معرفتى زادت بنسبة مش قليلة ، ومخى بقى اوسع كتير الحمد لله ، ودا مخلينى مش شايلة هم اى حاجة من اللى كنت بشيلها ومكتفه نفسى بيها قبل كدا

كمان مش مستقرة لا نفسيا ولاعمليا ولا اى حاجة ، ومش بسعى انى ابقى مستقرة  حاليا بالمفهوم الشائع  لكن بقى عندى يقين ان ربنا بيرتب احسن منى  فمش شايلة هم زى الاول على الاقل .
-----------------------------------------------------------------------------------------------------


كنت متعودة ان الناس بتهرب  بسرعة ومبيبقاش عندها طول بال ،  انا كمان بقيت زيهم ومعنديش طول بال واتعودت يبقى نفسى قصير وميطولش زيادة عن الازم ، واتعامل على اد طاقتى

بدءت اقلد وادخل فى تجارب غريبة عليا واعمل  كل اللى كان  بيخوفنى قبل كدا ، واعيش التجربة ومفضلش حاطة  نفسى بعيد فى قالب مش شبهى ولا افضل  فى وسط ناس نمطية مش بتتغير وعايزة تحط باقى الناس فى قوالب على مزاجها عشان معندهاش بدائل تانية


------------------------------------------------------------------------------------------------------

عشان النهاردة غير امبارح غير من شهر غير من سنة
كان نفسى اكتب ذكريات كتير حلوة هنا للسنة او السنتين اللى فاتو بس كالعادة مفيش حاجة بتستمر مهما طولت
ودى كانت حاجة صدقتها جدا السنة دى

-------------------------------------------------------------------------------------------------------
 
الحياة مش عادلة اطلاقا !
بس ربنا عدل وبيعوض وبيعطى وبيرضى وانا راضية ومتصالحة مع حياتى دلوقتى ومع الـ comfort Zone  اللى بتحتوينى وبتحتوى نفسى الضعيفة وبتعدى اخطائى وبتسامحنى فيها
ممكن مبقاش متصالحة مع كل  دا بعد شهر اوسنة او حتى بعد كام ساعة
بس حتى دا متقبلاه دلوقتى جدا