شهر خمسة !

 التعب المريح ولا الراحة المتعبة 

فى ناس لما ببعد عنهم بحس انهم بقو مبسوطين ومرتاحين  من غيرى , فى الوقت اللى ببقى متضايقة فيه من البعد دا والمسافات اللى بينا !
البعد بيخلى اى حاجة حلوة فى عنينا ... القرب بس هو اللى بيبوظ كل حاجة ...القرب الزيادة من اى حد ومن اى حاجة هى بداية نهايته .
الود الزيادة حاجة مرهقة اووى بالنسبالى وبيخوف ...  يمكن عشان كدا  العلاقات السطحية بس هى اللى بتكمل معايا  !
الود الزيادة بيقلق حتى لو مريح ! والحاجة اللى مش فى ايدينا دايما حلوة 

الايام بتعدى فى ثوانى حرفيا ! 

الفكرة انها بتعدى من غير جديد من غير اى انجاز ! بفضل اخطط وارتب فى بداية كل سنة وبداية كل شهر وطبعا بداية كل اسبوع وبداية كل يوم ! المشكلة ان دايما مبيبقاش فى اى نتيجة مرضية فى الاخر .. هى بس بتبقى مجرد بداية .. يظهر انى مش بس بسطح العلاقات انا بقيت بسطح كل حاجة .. كل اللى بيبقى معايا فى الاخر قشور عن كل حاجة.
شهر خمسة دايما بيفكرنى ان بعد خمس شهور هأدخل مرحلة تانية .. انا بقالى  سنة  او اكتر معملتش اى حاجة فى حياتى ! معملتش اى حاجة حرفيا ..  سنة كنت حاسة انى حمل تقيل اووى على نفسى وعلى كل اللى حواليا .. يمكن انهيت علاقات سخيفة بناس كتير وناس حددت علاقتى بيهم وناس تانية تعديت عليهم علشان حياتى تمشى بشكل يريحنى نفسيا او الاصح انى مخلتش حد يتدخل فى حياتى بشكل يأذينى  .. بس ماانجزتش اى حاجة مش عارفة كنت بعاقب نفسى ولا بعاقب اللى حواليا .. بس انا اتغيرت اووى اقدر اقول انى اتبدلت كليا نفسيا  .. حاسة حاليا بكمية تناحة عجيبة ..
انا مش محتاجة ارضى حد ولا اساعد حد اكتر من نفسى انا محتجانى اكتر من اى حد .. مينفعش اقبل باى شكل انى اكون طرف خسران فى اى حاجة .. مينفش ابنى اى حاجة على حساب راحتى .. والراحة دى معناها انى مبقاش مرهقة نفسيا لاى سبب .. بدئت استوعب ان مفيش حاجة بالساهل .. ومينفش ابقى طرف ضعيف عشان نفسى
انا بساعد نفسى والمرحلة دى هتعدى باذن الله !

مفيش انجاز يا داليا !

لسه بادئة اسمع الجملة دى الشهر دا ! مفيش انجاز فعلا ! انا بستسهل وفى نفس الوقت وقت ومجهود بيضيعو فى الفاضى ,
انا محتاجة اتعب شوية واشتغل على نفسى عشان ابطل استسهال او (استهبال ) بمعنى اصح .
البدايات  دايما بتبقى صعبة بس هى الفايدة الوحيدة اللى بطلع بيها فى الاخر .. ولازم تظبط !

سبت فراغ كبير !

 من فترة عميكة قررت ابطل اقرأ روايات اللى بدأت اقرئها اصلا بعد ما بطلت اتفرج على تلفزيون او اتابع اخبار وطبعا البلوكات لكل الناس المهتمة بإعادة نشر الاخبار او التعليق عليها .. بس طبعا الموضوع دا مكانش ناجح 100 % بسبب ان كتير من الاصدقاء وقرايبى بيحبو يشتغلو مذيعين نشرة اول مايشوفونى  ... فبطلت اشوف حد :D او اعلق على الاخبار
المهم الموضوع سبب فراغ كبير  طبعا ومكانش سهل بالمرة بس بس اتعلمت حاجة كتير كنت مأجلاها منها انى بدءت ادور على شغل واتعلم كروشية !

بدئت اتعلم كروشية !

نتيجة للفراغ السابق من حوالى شهرين اتعلمت 3 غرز اساسية وعملت شوية حجات صغيرة منهم شنطتين  وشراب فرده واحدة لـ رفيف :D  وكوفيتين لسه مخلصوش لانى انشغلت بعدها
المهم انها كانت تجربة لطيفة جداااااا وناوية اكمل فيها !